શનિવાર, 4 ઑક્ટોબર, 2014

બેંગ બેંગ


ટોમ ક્રુઝ અને કેમરૂન ડાયઝની ફ્લોપ ફિલ્મ "નાઈટ & ડે"ની રીમેક તરીકે સિદ્ધાર્થ આનંદે બનાવેલી ફિલ્મ "બેંગ બેંગ". "સલામ નમસ્તે","તારા રમ પમ","બચના-એ-હસીનો","અનજાના-અનજાની" જેવી રોમેન્ટિક હીટ ફિલ્મો આપનાર સિદ્ધાર્થ આનંદે આ વખતે એક્શન ફિલ્મ પર પસંદગી ઉતારી અને કમાણી કરવામાં સફળ પણ થશે.

ગ્રીક ગોડ જેવી શારીરિક રચના અને ચેહરો ધરાવનાર હ્રીતિક રોશને આ ફિલ્મ માટે ૩૦ કરોડ લીધા હોવાનું સંભળાઈ રહ્યું છે અને ફિલ્મમાં પોતાનો જીવ રેડી દઈને એને વસુલ પણ કર્યા છે. એક-એકથી ચડિયાતા હોલીવુડ જેવા સ્ટંટ સીન, એક્ટિંગ અને ડાન્સિંગમાં હ્રીતિક રોશને પોતાની ક્ષમતા પુરવાર કરી છે. ભારતના દિગ્દર્શકો જો હોલીવુડ જેવી ફિલ્મો બનાવાનો વિચાર કરે તો એમને ટોમ ક્રુઝ બહાર શોધવા જવો પડે તેમ નથી.
હોટ & સેક્સી દેખાતી કેટરીના કૈફ આ ફિલ્મમાં સ્વર્ગની અપ્સરાથી કમ નથી લાગતી. આ અપ્સરા અને ગ્રીક ગોડની જોડી વિષે કઈ બોલવા જેવું જ નથી રહેતું. એકદમ બેસ્ટ રોમેન્ટિક કપલ ઓન સ્ક્રીનનો ખિતાબ મળી જાય એવી જોડી છે.

લંડન, શિમલા, દહેરાદુન, પ્રાગ અને અબુધાબીના આંખોને પહેલી નજરે જ ગમી જાય એવા દ્રશ્યો અને એમાં ફૂલ ફટાક કોશ્ચ્યુમ જોઇને આંખને ઠંડક વળે છે.  કોઈ પણ ઉતાર-ચડાવ વગર ફિલ્મ એકદમ સ્મુથ્લી ચાલે છે જેના કારણે થ્રિલની મજા નથી રહેતી. ફિલ્મનું સ્ક્રીનપ્લે સારું છે. ડાયલોગ એવરેજ છે. સલીમ-સુલેમાનનું બેકગ્રાઉન્ડ સ્કોર અને વિશાલ-શેખરની બેલડીનું ગીતનું સંગીત મનને શાતા આપે છે. ફૂલ માર્ક્સ ઇન મ્યુઝીક એન્ડ સોન્ગ્સ.

ડેની ડેંગઝોપ્પાનો અવાજ આજે પણ એવી જ બુલંદી ધરાવે છે પણ એમના ભાગે કઈ વધારે કામ આવ્યું નથી, જાવેદ જાફરી તો એવરગ્રીન છે અને બાકીના સાથીદારોનું કામ પણ સારું છે. ફિલ્મ જાણે માત્ર હ્રીતિક-કેટરીનાની જ હોય એવી રીતે દર્શાવી છે.

દશેરા અને ઈદની રજાઓનો સમય પસાર કરવા માટે ફુલ્લી મનોરંજક એક્શન, કોમેડી ફિલ્મ.

Ratings :- 3/5

શુક્રવાર, 3 ઑક્ટોબર, 2014

હૈદર


વિલિયમ શેક્સપીયરની લખેલી કથા "હેમલેટ" પરથી વિશાલ ભારદ્વાજે બનાવેલી, લાગણી, ઘૃણા, હિંસા, બદલાની ભાવનાઓને હુબહુ ઉજાગર કરતી આ ફિલ્મ એટલે "હૈદર".

ફિલ્મનો ફર્સ્ટ હાફ થોડો બોરિંગ લાગે છે, વાર્તા થોડી ધીમી ચાલે છે. થોડું સ્ક્રીનપ્લે પણ નબળું પડતું જણાય છે પણ ફિલ્મ એના સેકંડ હાફમાં પોતાની ગતિ પકડે છે જે તમને તમારી સીટ પર જકડી રાખવા મજબુર કરી દે છે.

શાહિદ કપૂરની ડૂબતી નૈયા આ ફિલ્મ તારવી જશે. એની એક્ટિંગ જોઇને લાગ્યું કે એ પંકજ કપૂરનો દીકરો છે અને એમની એક્ટિંગ કુવામાંથી અવેડા માં ઉતરી છે. શાહિદ માટે આ ફિલ્મ ક્લાસ બની જશે. શ્રદ્ધા કપૂર, કે.કે.મેનન અને નરેન્દ્ર ઝા નું કામ પણ મહદઅંશે સારું છે. ફિલ્મની મુખ્ય નાયિકા ગણી શકાય એનું નામ છે તબ્બુ. જે પહેલા પણ એક્ટિંગની ખેરખાં હતી અને હજુ પણ છે કે જે એના ચેહરાથી સામેના માણસને દરેક વાત સમજવા મજબુર કરી દે છે. ઇમરાન ખાન માટે શબ્દો ઓછા પડશે. દિગ્દર્શન બાબતે ૧% પણ આંગળી ચિંધાય એમ નથી. બેકગ્રાઉન્ડ મ્યુઝીકની સાથે ગુલઝારના મધમીઠા શબ્દો,અને એની સાથે સુખવિંદર સિઘ અને અરિજિત સિઘના જાદુઈ અવાજ તમારા હૃદયના તારમાં ઝંઝાનાટી ઉત્પન્ન કરી દે છે.

પ્રેમની કંઈક અલગ જ વ્યાખ્યા જે દરેકની આંખમાં જુદી દેખાય છે અને એટલી જ હદે એજ આંખોમાં તિરસ્કાર, ઘૃણા, બદલાની ભાવના છલકે છે. ઉડતા લોહીના છાંટા, ધોળા દૂધ જેવા બરફના થર પર અલગ તરી આવે છે અને જે પ્રકારની હિંસા અને ક્રુરતા જે કાશ્મીરની ઓળખ હતી એને ઉજાગર કરવામાં વિશાલ ભારદ્વાજે કોઈ કચાશ નથી રાખી.

કોઈ ખાસ એક્શન-થ્રીલર મુવીની આશા રાખીને જોવા જનારને નિરાશા જ મળશે. અને ફિલ્મ માત્ર અમુક ચોક્કસ પ્રકારના દર્શકોને જ ગમશે કે જેને ક્લાસિક ફિલ્મો જોવી ગમતી હોય. પણ એક વાર તો જોવી જ પડે બોસ.

બોનસ :- કાશ્મીર એક કેદખાના હે મેરે દોસ્ત !
              મુજે અબ શક પે યકીન હે ઓર યકીન પે શક.

Ratings :- 4/5